Aaj trip ka aakhri din tha. Jyada dukh tha aur thodi si khushi thi. Dukh is baat ka tha ki aaj NZ ka trip khatm ho raha tha aur thodi si khushi is baat ki thi ki plane me free ka khana milega. Kuch plan nahi tha to subah walk ke liye nikal gaye. Is baar lake ke paas nahi, samundar ke paas walk kar rahe the. Walk ke baad chaaro ikhatta hue to ham wahi se ferry ki ticket leke Devonport chale gaye. Waha bhi Mt Victoria pe chota sa trek tha. Trek karke upar gaye aur waha se dur chal rahe Rugby match ko dekhne lage. Phir kuch der waha se samundar ka view bhi enjoy kiya aur bahot saari hawa bhi khayi. Waha se utare aur phir beach pe thoda bahot aur walk kiya. Itne me lunch ka time ho gaya aur bhook bhi lagi thi to khane chale gaye. Kuch jyada tha nahi karne ko Devonport me to ferry leke ham wapis Auckland aa gaye.

Auckland wale dost ke yaha chale gaye. Uske yaha chai pi ke ham phir apna apna evening walk karne nikal gaye. Is baar jetty ke paas walk kar rahe the. Bahot hi shaant jagah thi aur waha se Auckland ka Sky Tower bhi dikh raha tha jo kaafi lit tha. Bahot saare private yachts bhi waha docked the jisme se kuch sale pe the. Unka price dekha to pata chala bahot mehenge hote hai ye. Bas walk karte karte sab dekh rahe the. Kasam se, aaj ke din hamne bas walk hi kiya aur bahot saara walk kiya. Iske baad sab dost ke yaha pahoch gaye aur hamne unke yaha kuch der house party ki. Phir kareeb raat ke 1 baje hamne Uber book ki, dosto ko bye bola aur airport ke liye nikal gaye. Flight subah 6 baje ki thi. Airport pahoche aur phir so gaye. Thodi der baad uthke check in kiya aur phir so gaye. Gate khula to plane board kiya aur phir so gaye. Sydney pahoche, jaldi se transfer complete kiya, phir plane board kiya aur sote sote wapis aa gaye. Yahi tak tha ye safar.