To jump or not to jump was not a question in the morning. To subah subah pure confidence se jaake hamne tickets le li. Bungy jumping ki baat ho rahi hai. 4 me se sirf 2 logo ne ticket li thi. Slot 12:30pm ka mila tha. Thoda time bacha tha to ham Queenstown me hi ghumne lage. Pehle breakfast kiya, kuch souvenirs liye aur phir lake ke paas baithke ducks ko swim karte dekhne lage. Dekhte dekhte time ho gaya aur ham Bungy jumping wale location ke liye nikal gaye. Kareeb 12 baje Karawau bridge pahoch gaye jaha se kudna tha.

Waha dekha to kaafi log cheekh-chilla rahe the, par kud ke maze bhi le rahe the. Tickets to hamne le rakhi thi, to wahi, mar gaye to ham khud zimmedar honge wali formalities khatm karke ham kudne wali qatar me lag gaye. Kuch der me jab turn aaya to phir suit up karne lage. Matlab, wahi rassi wassi bandhne lage. Taiyar hue, ek do logo se baat ki waha aur phir kudne ke liye platform pe aa gaye. Jo bandi platform thi, wo bahot hi sahi thi. At least mujhe to bahot sahi lagi thi. Usne rassi wassi sab check kiya, kuch baat ki(instructions diye) aur phir kaha kud jao. “Tere liye to aaram se kud jaunga” aisa maine mann me bola aur kud gaya. Height jyada nahi thi, 45 meters. To starting me time nahi mila react karne ka, but jab rebound hoke upar aate hai tab thoda sa chillane ka time milta hai. Alag hi thrill hai ye bhi. Maza to aaya. Waha pe sab khatm hone ke baad, hamare paas kaafi time bacha tha. Socha aas paas kahi aur ghum lete hai.

Google karne pe Arrowtown naam ka ek town dikha. To chale gaye wahi. Arrowtown bahot chota sa town hai par bahot jyada sundar hai. Aisa lag raha tha pura town Autumn ke colors bhi ghul gaya hai. Charo taraf yellow, red, orange hi tha. Lunch ka time tha to kuch kha liya waha pe aur phir paas me hi walk pe chale gaye. Phir ice-cream khane ka mann kiya to wo bhi kha liya. Maine hokey-pokey flavour try kiya jo achcha nahi tha. Aisa lag raha tha ice cream me kisine boondi daal rakhi ho. Kuch boondi kha gaya aur kuch alag karke maine ice-cream khatm ki. Phir walk karte karte dekha ki paas me hi ek top point pe church hai. To gaadi nikali aur waha chale gaye. Waha se almost pura Arrowtown dikh raha tha. Kuch der waha baithe aur phir time ho gaya car return karne ka. Airport ke paas hi drop tha. Car drop karke airport pahoche, Air New Zealand ki flight me baithe aur phir back to Auckland. Uber karke dost ke yaha gaye aur so gaye. New Zealand me driving ka ye aakhri din tha.