Duniya me bhale hi sirf 7 ajoobe hai, kuch log Milford Sound ko 8va ajooba kehte hai. Aaj ke din hamne car ko ditch kar diya kyun ki Milford Sound ka hamne tour package book kar diya tha. Kaafi dur tha aur Queenstown se to drive karna kuch jyada tiring ho jaata. Bus pick up point me kareeb 7:15am pahoch gaye. Bus me chadne se pehle driver bhaiya ne ticket check kiya aur khane ke liye veg ya chicken ka option diya. Sabne apne preference ke hisaab se veg ya chicken bol diya aur maine chicken. Kuch aur log bus me chadhe aur phir ham waha se nikal gaye. Kaafi aage jaake ham Te Anau pahoche jaha kuch aur log bhi chadhe aur hamne breakfast bhi kar liya. Views yaha bhi bahot sundar the.

Raaste me mirror lake aata hai jaha ham 5 mins ruke. Kuch photos click kiye aur phir nikal gaye. Kuch der drive karke driver bhaiya ne phir bus rok di. Waha pe water spring tha jo driver bhaiye ne kaha ki ekdum shuddha pine wala paani hai. To sabne apne bottles khali kiye aur wo paani bharkar Amrit ki tarah pine lage. Ye maine bhi kiya. Yaha pe kyun chances lena. Phir kaafi der baad Milford Sound aa hi gaya. Waha driver bhaiya ne sabko lunch box diya jisme chicken sandwich, apple, juice aur ek egg tart tha. Khane ke baad pata chala ki egg tart me bacon bhi tha. Dharm bhrasht ho gaya yaha pe. Ab kya, thoda kha hi liya tha to pura khatm kar diya. Baad me Ganga ji me doobki laga hi lenge.

Khane ke baad hamara swagat ferry me hua. Paani ke chaaro taraf pahad the aur choti si jagah se paani Tasman Sea me milta tha. Un pahodo me bahot saare paani ke jharne bhi the. Ek jagah to ferry almost ek waterfall ke niche chali gayi. Paani ferry ke saamne wale hisse pe girne lagi aur kuch logo pe bhi jo waha khade the. Mai bhi un logo me tha. Waha se aage hamne kuch seals bhi dekhe. Aaram se sun bathing kar rahe the. Kareeb 1.5 hours ferry pe ghumne ke baad ham wapis bus ke baas pahoch gaye. Waha se nikale aur 8 baje tak ham Queenstown aa gaye the. Dinner bahar kiya aur wapis room chale gaye. Packing ki agle din ke liye, thodi der cards khele aur so gaye.