Subah subah lake ke pass walk karne ki pratha ko kayam rakhte hue hamne din ki shuruat ki. Par is baar bas 5 mins me hi waha se nikal gaye. Waha se nikalne pe pehla stop Cardrona me liya aur waha ek 150 saal purana Cardrona hotel dekha. Andar jaake thodi si hotel ki sair ki, kuch boards padhe aur aag ke paas baith gaye. Shayad use fireplace bhi kehte hai. Kuch snacks order kiye khane ke liye jo ki bahot hi vaahiyaat the.

Waha se Nikala to dekha ki aage ka raasta band tha. Shayad kuch accident hua tha. Kuch 15 mins hamne wait kiya ki shayad raasta clear ho jaaye, par aisa nahi hua. To hamne gaadi piche modli. Zindagi me bhale hi aage badhte raho par car to piche mod hi sakte hai. Ham wapis Wanaka chale gaye aur ped wale lake me kayaking ke liye chale gaye. Bahot maza aaya. Ducks ko thoda pareshan bhi kiya. Actually, khel rahe the. Unhe ham chase kar rahe the par wo bahot tez hote hai paani me. Iske baad ham wapis Queenstown ke liye nikal gaye. Ab raasta bhi khul gaya tha. Raaste me bahot saare ghats the to ham ek pull over point me ruk gaye.

Wo view point bhi tha aur waha se Roys peak ka trek bhi shuru ho raha tha. Chale gaye trek pe. 1 ghanta trek karne ke baad ham actually baadal me pahoch gaye the. Bahot hi tez thand hawa chal rahi thi. Kuch der me ham wapis aa gaye aur phir Queenstown ki taraf nikal pade. Ab tak google maps ne bahot madad ki thi hamari par is baar thode maze bhi le liye. Hamara stay ek cemetery ke paas tha aur jaise hi ham cemetery ke paas pahoche, google maps wali didi boli, “You’ve arrived at your destination” Par ham zinda the, to apne hotel me chale gaye. Kuch der rest kiya. Pata chala paas me lake bhi hai, to phir lake ke paas walk karne chale gaye. Is baar evening walk tha. Thodi thand bhi thi waha, kareeb 8 degree C, to aur maza aa raha tha walk karne me. Walk ke baad ice cream khayi aur wapis aa gaye. Cards khele, agle din ki tayari ki aur so gaye.