Subah hui aur room se bahar nikale to pahad dikhe. Par ham lake ke paas walk karne chale gaye kyun ki aaj phir hamara stay lake ke paas tha. Wapis aaye, gaadi nikali aur nikal pade Wanaka ki taraf. Kareeb 200kms ka drive tha. Subah ka time tha aur bhook bhi lag rahi thi, to breakfast ki liye ham Twizel me ruk gaye. Twizel autumn ke colors me dhal gaya tha. Waha breakfast kiya, hot chocolate li aur raaste ke liye kuch donuts bhi le liye. Raaste me hamne kaafi stops bhi liye. Pehle to ham High Country Salmon Farm me ruke. Kuch khaas tha nahi, bas Salmon machliya thi bahot saari jinhe log khana khila rahe the.

Waha se nikale aur next stop tha Omarama Clay Cliffs. Waha pe 4kms ka private raasta tha aur gate pe likha tha ki 5NZD ka ticket lena hai. Hame aas paas koi dikha nahi jisse ticket le sake to ham aage wali gaadi ko follow karte hue andar chale gaye. Thodi der me clay cliffs ke paas pahoch gaye. Chikni mitti ke chattan. 15 mins walk karne ke baad ham chattano me pahoch gaye. Mai aur meri ek dost, ham dono thoda steep climb karke aur upar chale gaye. Waise utna upar chadhna worth to nahi tha, par us waqt maine sabko yahi kaha ki upar se achcha view milta hai. 5 mins baad waha se utarna tha.

Jo steep ascent tha wo ab steep descent ho gaya. Mai to light on my feet hu to aaram se utar gaya. Par meri friend ko realise hua ki utarna mushkil hota hai. Wo kuch der ke liye rone lagi. Par mujhse apne dost ko niche utarne me struggle karte dekha nahi gaya to maine ignore kar diya use aur dusri taraf dekhne laga. Maine thodi na bola tha use upar jaane ke liye. Thodi der baad, pata nahi kaise par niche aa gayi aur ham phir gaadi ki taraf chalne lage. Gaadi leke nikale aur entry gate ke paas pahoche to wo is baar band tha. Use khola to uske board pe likha tha, “Entry restricted and trespassers will be prosecuted”. Phir kya, bhaage ham waha se. Waha pe hot tubs bhi the. Puch taach karne pe pata chala ki 90mins ke 60NZD charge karte hai. Ham to waise bhi price sunke nikalne wale the par usne kaha ki sab occupied hai currently. To hamne “Oh” kaha aur waha se nikal gaye. Uske baad Lindin Paas pahoche, kuch der baithe aur phir next Wanaka pahoch gaye.

Waha to pehle ham Lavender farm chale gaye. Lavendar ice cream li aur farm dekhne andar chale gaye. Hamare saath hua dhokha. Lavender farm to tha par season nahi tha. To Lavendar to nahi mila, mile to bas ghaas, bhains aur ityaadi jaanwar. Bhaage waha se aur paani wala ped dhundne nikal gaye. Kuch der drive karne ke baad ham Lake Wanaka pahoch gaye.

Lake kaafi sundar tha aur uske aas paas bade bade autumn ke rango me dhale ped the. Phir walk walk karte us paani wale ped tak bhi pahoch gaye. Bahot saare log uske photos khich rahe the to hamne bhi kuch photos khich hi liye.

Waha aas paas thoda ghume. Phir kuch der baad khane ke liye restaurant dhunde lage. Luckily Wanaka me sab kuch jaldi band nahi hua tha. 7 baj rahe the aur ham Water Bar restaurant chale gaye jo ki lakeside tha. Waha mast khaya piya aur wapis stay ke liye nikal gaye. Campsite pe stay tha jaha pe apna room dhundna ek quest ki tarah tha. Mai mast gaadi me baitha tha aur baaki sab andhere me room dhund rahe the. Jaldi hi dhund liya. Phir kya, mast jaake so gaye kyun ki aaj to pet bhara hua tha.