Aaj ka din shuru hua lake ke paas walk karke, kyun ki ham lake ke paas hi the. Lake bahot sundar lag raha tha subah subah. Paani ka color turquoise tha aur paani ekdum shaant bhi tha. Paas me hi Church of Good Shepard bhi tha. Thodi der walk ke baad, supermarket se kuch snacks lekar ham Mount Cook ki taraf nikal gaye. Mount Cook New Zealand ka sabse uncha mountain hai. Kuch der me lake Pukaki pahoche aur thodi der wahi ruk gaye. Paani bahot thanda tha. Kuch der waha baithke, ham phir nikal gaye.

Journey bahot hi scenic thi. Ek taraf lake aur ek taraf pahad aur badal jo pahado ko kaat rahe the. Jitna aage ja rahe the, safar utna hi sundar ho raha tha. Aur shayad isliye, waha bahot saare pullover points the. Hamne to sadak pe baith ke photos bhi khichwaye. Kaafi points me rukte rukte aakhir me ham trek ke starting point tak pahoch gaye. Waha jaake hame 3 trek options dikhe. Ek tha Kia Point ka trek jo ki 30 mins tha. Phir Muller’s Hut trek jo ki around 6-8 ghante ka tha. Aur Hooker Valley trek jo ki kareeb 3 ghante tha. Ham Hooker Valley trek ke liye nikal pade. Mausam kuch jyada hi badhiya ho rakha tha. Halki halki baarish ho rahi thi.

Hame kareeb 3 ghante one way me lage. Views hi itne sundar the ki ham baar baar ruk rahe the. Achcha sa trail bana hua tha aur beech me 3 suspension bridges bhi the. End me glacial lake tha jo Mount Cook aur baaki mountains ke ice se bana tha. Paani me baraf ke tukde tair rahe the. Maine to kuch tukde uthakar juggling bhi ki. Mountains ke upar ka hissa pura baraf se ghira tha. Kuch der waha bitakar ham wapsi ke liye nikal gaye.

Kareeb 5:30pm tak ham wapis starting point par aa gaye. Bhook lag gayi to kuch fruits jo carry kiye the, wo kha liye. Kia Point dekhne ka mann bhi tha, par shayad aate aate andhera ho jaata. To ham waha se Glentennar Park ki taraf nikal gaye jaha hamara stay tha. Waha pahochte hi baarish shuru ho gayi. Bhook lagi thi par aas paas khane ke liye kuch bhi nahi tha. Ek cafe tha jo band ho chuka tha. NZ things. Hostel room chale gaye. Socha kitchen jaake kuch banake kha lenge. Par kitchen me bahot saare log already khana bana rahe the. Aur bahot saara bana rahe the, matlab proper meal. Phir hame apna backup option use karna pade. Bag se bread aur jam nikala, aur kha liya. Aaj bhi baarish ki wajah se star gazing nahi kar paaye. Phir room me jaake so gaye.