New Zealand me bahot saare lakes hai aur aaj hame Lake Tekapo jaana tha. Subah ghar pe french toast banake khaya aur bahar nikale. Aur ghar se bahar nikalte hi hame Autumn ke colors ki jhalak mili. Hamne Uber book ki aur nikal gaye airport ki taraf. Plane se nahi, car se jaana tha Lake Tekapo. Road trip kar rahe hai to car to chahiye thi. Aur jo car hame pick karni thi, wo airport ke paas thi. Is baar white Camry mili. Waha se car leke ham Christchurch city dekhne nikal gaye.

Christchurch ki aabadi kareeb 4 lakh hai aur ye South Island ki sabse populous city hai. Par ye hame us din nahi laga. Us din Easter ki chutti thi to saare streets khali the aur log bahot kam dikh rahe the. To ham gaadi parking me lagake aas paas ghumne lage. Yaha ke street walls pe kaafi saare graffiti the. Chalte chalte ek park me chale gaye. Wo park autumn ke colors se kuch jyada hi sundar lag raha tha. Green se red tak, saare shades the. Windy hone se thodi thand bhi lag rahi thi. Phir kya, waha ki hamari favourite drink pine chale gaye. Hot chocolate. Waha se ek port ki taraf chale gaye. View to achcha tha par aas paas kuch tha nahi to nikal gaye.

Aaj hame Lake Tekapo jaana tha aur waha tak ka drive 240 kms ka tha to socha lunch karke nikal hi lete hai yaha se. Taco Bell gaye, pet puja ki aur phir nikal gaye. Kaafi drive karne ke baad ham sunset se pehle Lake Tekapo pahoch gaye. Waha pe Lupins dekhne the par saare sukh gaye the. Inhe dekhne ka best time November-December me hota hai aur ham gaye the April me waha pe. Phir wahi lake ke aas paas walk karne lage. Bahot hi sundar jagah thi. Lake ke aas paas ke ped yellow color ke ho gaye the aur waha pe bahot se pine ke bhi ped the. Thoda aur walk kiya to khargosh bhi dikhe.

Thodi der baad waha se nikal gaye apne stay ke paas. Aaj ka apna stay bhi lake ke paas hi ek hostel me tha. Thoda fresh hoke hostel se nikale phir se bahar walk karne ke liye. Par phir baarish hone lagi to ham paas me hi ek souvenir shop me chale gaye. Socha tha yaha pe badhiya se star gazing karenge par mausam ne apna saath nahi diya. Phir karna hi kya tha, back to hostel.