Subah hui aur bahar halki halki dhoop thi aur bahot hi pleasant weather ho rakha tha. Breakfast ka mahaul ho rakha tha, kyun ki bhook lagi thi aur breakfast ka time bhi ho gaya tha. Reception wale uncle ne kaha tha ki paas me achcha sa cafe hai breakfast ke liye. To ham chale gaye andar. Kuch der ke liye ham bhool gaye the ki ham ameer nahi hai. Par andar chale gaye to chale gaye. Itne bhi gareeb nahi hai ki wapis bahar nikal jaaye. Kaafi mehenga cafe tha aur kuch khaas bhi nahi. Yaha pe group ke ek sadasya ko zabardasti coffee pilayi gayi aur nikalte waqt uske paise bhi liye. Thoda sa bura laga par hamne bhi waha se chote chote butter/jam ke packets utha liye. Ki shayad bread ke saath kaam aa jaaye. Us din hame 12 baje car wapis karni thi.

Cafe ke baad ham Hokitika gorge ke liye nikal gaye. Time thoda kam tha to thoda tez hi gaadi chala ke gaye the us din. Gorge bahot sundar tha. Paani ka color turquoise tha. Thoda bahot ghume, kuch photos click kiye aur wapis Greymouth ke liye nikal gaye. Car wapis karne se pehle uski tanki full karni thi. To fuel station jaake petrol daalne lage. Par us pump se petrol sahi se aa nahi raha tha. To hamne store me jaake petrol pump wale bhaiya ko bula liya. Bhaiya aaye aur bole,

“Oh teri, isme petrol nahi diesel daalna tha bidu”

Of course, angrezi me bola ye bhaiyya ne. Waha to hame thodi tension ho gayi. Phir jab hamne double check kiya to dekha, petrol hi daalna tha. Petrol wale bhaiyya yaha thoda sa sharminda ho gaye and maafi maangne lage. Hamne bhi maaf kar hi diya, kyun ki bhaiyya funny bhi the. Petrol daala, aur gaadi wapis kardi. Thodi der me TransAlpine train se travel karna tha. Ye train west coast me Greymouth se hokar east coast me Christchurch tak jaati hai.

Journey 5 ghante ki thi aur bahot hi sundar aur scenic bhi. Train me kuch pancakes khaye aur hot chocolate liye tha. Kareeb 7 baje ham Christchurch pahoch gaye. Uber book ki aur stay pe pahoch gaye. Airbnb se book kiya apartment bahot hi sundar aur spacious tha. Phir paas me hi supermarket se kuch samaan le aaye, pakaya, khaya, cards khele aur so gaye.