Subah ho gayi aur ham apne host Caroline se vida lekar nikal pade. Caroline ko dekha to nahi hamne but jaha pe uska Airbnb ghar tha, use dekhna bhi nahi tha. Aaj ke din ka Skydive book kar rakha tha hamne, to nikal gaye aasman se girne. 9am ka slot tha aur ham kareeb 8:45am tak pahoch gaye. Bheed nahi thi to wait nahi karna pada. Jaate hi disclaimer sign karna tha jisme likha tha ki agar ham mar gaye to usme sirf aur sirf hamari galti hogi. Sign kar diya kyunki darr ke aage jeet hai aur bahot saare paise bhi diye the sky diving ke liye. Phir kya, suit pehen ke tayaar ho gaye. Divers ne brief kiya aur ham nikal pade choti si plane ki taraf jo hame 16500 feet unchai par le jaani wali thi.

Plane me baithne par aisa laga ki India me train ke kisi general coach me baithe ho. Choti si jagah me 8 log baithe the. Aur kuch log niche hi baithe the kyun ki plane overfull lag raha tha aur un becharo ke liye baithne ki jagah nahi thi. Mujhe to seat mil gayi thi to bahar ka mast view mil raha tha. Kareeb 15 -20 mins me ham 16500 ft altitude pe pahoch gaye. Plane ka darwaza khula aur thodi thand lagne lagi. Phir kya, kud gaye. Kareeb ek min ka free fall tha. Gravity ne apna kamaal dikhaya aur hamne 200kms/hr ki speed chu li. Ekdum alag hi feeling thi. Thrill tha, speed tha aur niche ka view bhi speed se zoom ho raha tha. Badal niche aur ham upar the. Oops, let me rephrase it.

Aaj mai upar, badal hai niche

Aaj mai aage, mera instructor mere piche

Freefall ke baad parachute khulte hi sab shant sa ho gaya. Saari speed gayab ho gayi aur ham patte ki tarah niche aane lage. Us waqt niche ka nazara saaf dikhne laga. Tasman sea, pahad, valley, kiwi plantations. Bahot hi peaceful sa tha. Kuch der me phir ham niche aa hi gaye. Bas ho gaya skydive. Phir paas me hi coffee shop se hot chocolate piya aur kuch der wahi baithe rahe. Skydive ke liye hamne thoda buffer time rakha tha, jo bach gaya kyunki yaha sab time se hua. To hamne socha aas paas kuch explore kar lete hai. Coffee shop pe hi kuch logo se baat ki to unhone hi ek beach suggest kiya.

Kaiteriteri beach. Waha chale gaye. Bahot sundar beach tha. 200 meters trek karke aage gaye to waha se aur bhi sundar view tha sea ka. Phir waha se nikal gaye. Kaafi lamba drive tha aaj ka. West coast pe Greymouth pahochna tha. To bina jyada breaks ke ham safar pe nikal gaye. Sunset se pehle west coast road pe pahochna tha aur ham pahoch bhi gaye. West coast pe hi Punaikaiki me ruk gaye jo ki pancake rocks ke liye famous hai. Pancake rocks dekhke aisa lagta hai ki bahot saare pancakes stack kar rakhe ho. Kuch alag tha. Thodi der wahi tehel rahe the.

New Zealand me pehli baar sun ko sea me set hote hue dekha. Achcha tha. Sunset ke baad ham waha se hostel ke liye nikal gaye. Socha aaj brewery jaake beer piyenge but Good Friday tha to brewery jaldi hi band ho gayi. KFC gaye to wo bhi band ho gaya tha. Finally McDonalds me jaake kuch khaane ko mila. Back to hostel and end of the day.