Aaj breakfast ghar pe kar liya tha, kyun ki pichle din ham Sanjay ki dukaan se kuch cheeze le aaye the. Eggs aur tuna sandwich. Apna pet bhar gaya par car ka pet khali tha. Paas me hi BP connect ka petrol station mil gaya. Waha jaake figure out kiya ki petrol kaise bharte hai. Pehli baar gaadi me petrol bhara waha pe. Phir nikal pade drive pe. Kaafi lambi drive thi Wellington ke liye. Beech me ek stop liya aur waha chai pi. Sorry, English chai. Pata nahi ye kya hota hai, aur kyun hota hai. But ye aakhri baar waha English chai pi.

Finally around 2:30pm ham Wellington pahoche. Wellington bahot windy hai. Kuch jyada hi hawa chalti hai. Waha pe hostel me checkin kiya aur phir nikal gaye. Gaadi me fuel phir kam ho gaya tha aur hame us din fuel full karke car return karni thi. To pehle gaadi me petrol daala aur phir paas me ek Te Papa museum me chale gaye. Museum ko upar se dekhna start kiya to pehle 6th floor chale gaye. Wellington ke dock ka kaafi achcha view tha waha se. Baaki ghumne pe utna kuch khaas laga nahi museum. Bas Maori wala part kaafi achcha tha. Moana movie ki yaad aa gayi sab dekh ke.

Bhook lagi thi to waha se nikale aur Dominos me jaake pizza kha liya. Indian pizza waha jaake bhi. Uske baad hame Mt Victoria jaana tha jiske upar se pure Wellington ka view milta hia. To trek karna start kar diya. Kuch 1.5 kms ka trek tha aur kaafi refreshing tha. Trek karke upar pahoche to dekha waha pe road se bhi pahoch sakte the. But no regrets, trek me bhi maza aaya. Top point se actually 360 view tha. Pura ka pura wellington dikh raha tha. Waha se bhi sunset dekha. Aur is baar sun aadha clouds ke piche tha aur pahodo ke piche set ho raha tha.

Sunset ke baad waha se nikale aur car return karne chale gaye. Car return karne ka baad socha bus se wapis jaate hai hostel. Hostel ke reception pe kisine bus number bataya tha wapis aane ke liye, to usi number ke bas me chad gaye. Kuch der to wo sahi direction me ja rahi thi, phir achanak se destination se dur jaane lagi. To maine jaake driver bhaiya se pata kiya, aur unhone bus wahi rok ke hame utar diya aur wapis jaane ka raasta bhi bataya. Aur paise bhi nahi liye. Phir google maps pe check kiya to around 1.4 kms ka walk tha, to paidal hi wapis chale gaye. Phir waha pe ek Wellington ka dost mila jiske saath ham dinner ke liye chale gaye. Bahot bolta tha wo. Phir dinner ke baad wapis hostel gaye aur so gaye. Agle din jaldi uthna tha.