Kuch jyada planned nahi tha first half ke liye to ham Kuirau park me chale gaye. Park kaafi bada tha. Waha pe hame ek chota sa pond dikha jaha pe kuch birds bhi dikhe. Pehle to hame laga ki wo Kiwi birds hai but hamari birds ki knowledge bahot kharab nikli. Kiwi birds nahi the wo. Us pond se thoda bahot dhua bhi nikal raha tha. Park me aur ghumne pe hamne dekha ki wo jagah geo thermal ponds se bhari hui thi.

Sab ponds se dhua nikal raha tha. Aur ek jagah kuch log paani me pair daal ke baithe the, to ham bhi chale gaye. Paani garam tha aur maza bhi aa raha tha. Uske baad ham us park se nikle aur Sulphur point chale gaye. Sulphur point pe ek lake hai. Theek hi tha. Bada sa lake tha aur kuch points se dhua nikal raha tha. Waha pe bhi warning signs the ki andar nahi jaana, aur dekh ke itna ajeeb laga raha tha ki koi andar jaaye bhi na. Waha se nikalne lage.

Phir yaad aaya ki Redwood trees to dekhe hi nahi hamne abhi. Pichle raat jab gaye the to andhera tha aur unhone treewalk ke time artifial jugna laga rakhe the. Phir kya, chale gaye Redwood trees din me dekhne. Pahochne pe laga ki achcha hua hamne ye miss nahi kiya. Bahot bade bade ped the aur kaafi dense. Kareeb 60-70 meter lambe hote hai ye. Dekh ke pata nahi chala, iske baare me padha tha maine. Walking trail bana hua tha to thoda wahi pe walk kiya hamne.

Cycling trail bhi tha to ek friend ko waha pe cycling karni thi. To cycle rent ka pata karne nikal gaye. Price itna jyada tha ki hamari car ka per day rent cheap tha. Apna ho gaya tha Rotorua me to phir ham apne next stop Taupo ke liye nikal gaye. Kuch der drive karne ka baad, ham Taupo pahoch gaye. A beautiful place. Waha pe ruk ke fish khaya. Masale ki kami thi. Kuch der me ham lake ke paas chale gaye. Bahot bada lake tha. Uske aas paas walk kiya aur phir baith ke sunset dekha. Bahot hi sundar view tha. Sunset ke time, clouds ka color bhi change ho gaya tha. Kuch orange-pink type ho rakhe the. Bas dekhte hi baithe the kuch der waha.

Phir andhera hone laga to ham Turangi ke liye nikal gaye jaha pe apna stay tha. Ek ghante ke andar ham waha pahoch gaye. Turangi choti si, pyaari si jagah hai. Jyada kuch hai nahi waha. Bhook lag rahi thi to paas me ek fast food cafe tha. Waha jaake kuch kha liya. Socha agle din ke khaane ki kuch taiyaari kar lete hai. To general store dhundne walk pe nikal gaye. Jyada kuch khula nahi tha raat me. But finally ek Indian supermarket mil gaya. Sanjay ki dukaan thi, ekdum khufiya jagah me. Kuch bread, eggs, tuna fish kharida. Aur ha, maine popsicle bhi liya tha. Waise baakiyo ko bola tha ki achcha hai us waqt par sirf barf tha wo. Bakwas.