Kal jo mehat se parking dhundi thi, use chodne ka time aa gaya tha. Subah Auckland se nikale Matamata pahochne ke liye jaha pe hamne Hobbiton movie set tour book kar rakha tha. Took a stop at Chartwell mall in Hamilton. Thodi shopping ki waha pe. Bhook lagi thi to mall me hi McDonalds me breakfast kar liya. Aur Matamata ke liye nikal gaye. Raasta bahot sundar tha. Dono taraf greenery thi. To hamne car wahi side me park ki aur nazare ka maza lene lage. Waha se nikale aur jaldi hi Hobbiton Movie Set pahoch gaye.

Tour ke liye ek bus se movie set ke starting point tak le jaate hai. Kareeb 2 ghante guide ne pura movie set explore karaya. Bahot greenery thi waha aur Hobbit ke chote chote houses bhi. Ameero ke gharo me bahot windows aur baakiyo ke gharo me bas ek window. Darwaza kholo to ghar khatm. Bas bahar se hi dikhate hai ye ghar movies me. Paas me ek lake bhi tha. Kuch bhi disappointing nahi tha waha. Finally apna guided tour ek freshly brewed beer ke saath khatm hua. Phir ham Rotorua ke liye nikal gaye jaha hamne aaj ka stay via Airbnb book kiya tha. Waha pahoche, freshen up hue aur phir ham apne next planned activity ke liye ready ho gaye. Redwood tree walk in the evening. Par bhook bahot lag rahi thi to ham paas me hi Taco Bell me chale gaye. I think bhook itni lagi thi ki jo bhi order kiya, kaafi tasty tha. Waha pe bahot saara khana khaya wo bhi kaafi reasonable price me.

Phir ham Redwood tree walk ke liye nikal gaye. Waha pe unhone suspension bridges bana rakhe the redwood trees se connected. Usi pe walk karna tha. But andhera ho gaya tha to Redwood trees dikh bhi nahi rahe the. Jo bhi ho, NZ walo ka bhi sahi hai. Unhone pedo par lanterns laga rakhe the aur kuch chamchamati lights bhi. Diwali ki vibe aa rahi thi waha pe. Treewalk khatm karne ke baad ham wapis ghar aa gaye. Dost ke pass Exploding kittens naam ka card game tha, to wahi khelne baith gaye. Apne beginner luck se mai kaafi saare games jeet gaya. Bas, ho gaya aaj ka.