Kya kare kya na kare, ye kaisi mushkil haaye. Ye first day tha NZ me, to jyada kuch karna nahi tha. 2 islands shortlist kiye the explore karne ke liye. Rangitoto islands and Waiheke Island. In the end Rangitoto ko dur se dekha ferry me baithe hue aur Waiheke pass se explore karne chale gaye. 12pm ki ferry miss kar di thi to phir next 1pm wali mili. Waiheke pahochte hi turant bhook lag gayi. Since, hop-on-hop-off bus book kar rakhi thi, usme chad gaye aur stop number 5 ke liye nikal gaye kyunki waha pe wineries aur restaurants the. Ek winery Jaake waha pe kuch wines taste kiye. Theek hi tha. Wineyards dekhe, olives ke ped bhi dikhe waha. Mere ek friend ko ek waha ke bande ne kuch kaha jo use samajh nahi aaya. Uske baad

Friend : What language are you speaking?

Him : Same as you but just faster than you.

Sunke bada maza aaya. Aur phir ham waha se nikal gaye. Phir pet se awaaz aayi to realise hua ki hamne kuch khaya hi nahi. To wahi pe dusre restaurant chale gaye. Time thoda jyada ho gaya tha to us restaurant me sab kuch serve nahi kar rahe the. To hamne kuch ghaas phus order karke kha liya waha. Phir next hop-on-hop-off wali bus ka wait karne lage. Bus se aage badhe aur ek beach pe utar gaye. Phir map dekha to realise hua ki ek aur achchi jagah hai jo hame dekhni hai aur hamare paas time ki kami hai. To almost beach pe ghumke ham wapis usi bus me baith gaye. Phir last stop pe utare jaha se almost 360 degree view mil raha tha. Waha pe trek ke liye ek raasta tha to trek karne nikal gaye. Ek chota sa waterfall dekha, jo ki bakwas tha aur thodi der me wapis aa gaye. Sunset ka time ho raha tha to view aur bhi sundar ho gaya. Green bed, a blue sky with some clouds and the sun party behind the hills. Best view of the day. Shayad mai thoda biased hu sunsets ki taraf. Phir kya tha, got the bus, back to ferry point, and then back to Auckland.

But wait.. Aaj ka program khatm nahi hua. Shaam abhi baaki hai mere dost.. Agle din hame road trip start karni thi aur uske liye sabse important cheeze hoti hai car. Hamne car pehle se hi book kar rakhi thi aur use airport jaake pick karna tha bas. Sounds simple, but tha nahi itna. Airport pahoche and  to our surprise, wo pick up point nahi tha. Bhala ho us cab wale bhaiya ka jisne car rental wale se baat karke hame sahi jagah pahochaya. Aur wo jagah thi car rental ki shuttle service point. Waha kuch der rukne ke baad unki shuttle aayi aur ham usme baithke finally car ke paas pahoch gaye. Formalities karke car pick ki aur ghar ke liye nikal pade. Car chalane ki thodi practice bhi ho gayi. Ab car ke liye parking dhundni thi. Paid parking ka kuch samajh me nahi aa raha tha. To kareeb ek ghante baad finally hamne ek spot dhund ke gaadi park kar di. Puchne pe pata chala ki raat ke parking charges nahi hote aur subah hone pe start honge. Life me pehli baar itna time laga tha parking ke liye. Thak gaya tha, to jaake wapis so gaya.